भाजलेल्या कैरीचे पन्हे- Sunmer special Smoky पेय! ❤️🥭

 भाजलेल्या कैरीचे पन्हे- Sunmer special Smoky पेय! ❤️🥭

 कै-या छानपैकी गॅसवर भाजून Smoky flavour चे पुदिना टाकलेले पन्हे जब्राट लागते!

असह्य उन्हाळा देखील आवडायला अनेक गोष्टी कारणीभूत आहेत, त्यापैकी एक म्हणजे चटपटीत कैरी/ आंबा! 😍🥭 मस्त हिरव्यागार त-हेत-हेच्या कै-या बाजारात दिसत आहेत आणि लाॅकडाऊनमुळे थोडासा वेळही उपलब्ध आहे. कैरीचे लोणचे, चटण्या, भाज्यांमधे आणि वरणामधे कैरी टाकून आपण खात आहोतच. अशातच कैरीचे पन्हे पण नक्की बनवून पहा. कैरीचे पन्हे, त्या उकडून किंवा भाजून दोन्ही प्रकारे बनवता येते. मस्तच लागते. ग्लासमधे बर्फाचे तुकडा घालून त्यावर थंडगार पन्हे ओतून प्यायची मज्जाच वेगळी. उकडलेल्या कैरीचे पन्हे आई नेहमीच करते. त्याची स्वतंत्र पाककृती आधी दिली आहे. भाजलेल्या कैरीच्या पन्ह्याची मुख्य पाककृती Annapurna in you च्या सोनल पंडित जांभेकर Sonal Pandit Jambekar यांची आहे.  मी त्यात काळेमिरे देखील टाकले आहे. 💁🥭❤️

चला भाजलेल्या कैरी पन्हेसाठी काय काय लागते पाहूयात:

आपल्याला लागणार आहे:

१. २ मध्यम कैरींचा गर (भाजलेल्या). साधारण एक मोठी वाटी (गोडसर आंब्याच्या असल्या तरी उत्तम)

२. साखर: पाव वाटी

३. गुळ: पाव‌ वाटी किंवा थोडा अधिक

४. जिरा पावडर: अर्धा ते पाऊण चमचा

५. काळेमिरे: ५-६ (मुख्य पाककृती मधे घातलेले नाहीत. )

६. वेलची पावडर: ४-५ वेलच्या खलून

७. पुदिना: पाव वाटी

८. सैंधव मीठ: स्वादानुसार

९. साधे मीठ: स्वादानुसार

१०. केशर काड्या

कृती:

१. हिरव्यागार कै-या स्वच्छ धुवून घ्या. पुसून गॅसवर अगदी खरपुस भाजा. 

२. थंड झाल्यावर साले अलगद सोडवून घ्या. सगळा गर व्यवस्थित काढून घ्या आणि साल व बाठा फेकून द्या. 

३. जितका गर त्याच्या अर्धी साखर आणि अर्धा खिसलेला गुळ ह्यात घाला आणि सोबतच जरासे सैंधव मीठ, साधे मीठ, काळेमिरे, जिरा पावडर आणि पुदिन्याची ताजी पाने घालून मिक्सरमध्ये फिरवून एकजीव करून घ्या. कैरी जितकी आंबट तितकी साखर आणि गुळ जास्त लागतो. तुमच्या आवडीनुसार हे प्रमाण कमी जास्त करा. (पन्हे स्टोअर करायचे असल्यास पुदिना घालू नका. पुदिना मुळे काळपट रंग येऊ शकतो. वेळेवर पन्ह्यामधे पुदिना पाने आणि पाणी घालून मिक्सरमधून फिरवून घेऊ शकता.)

४. ह्या मिश्रणात खलबत्त्यात खललेल्या वेलचीची पावडर आणि केशर काड्या टाकून मिक्स करा. 

५. आपल्याला पन्हे साठी लागणारा पल्प तयार आहे. बाटलीमध्ये किंवा डब्यामधे भरून फ्रीजमध्ये ठेवून द्या. हवे तेव्हा ग्लासमधे पल्प काढून त्यात पाणी घालावे आणि मस्त ढवळून घ्यावे.  पाणी किती घालावे ह्याचा अंदाज तुम्हाला येईलच. अफलातून चटकदार लागते पन्हे... मस्त स्मोकी फ्लेवर! बर्फाचे खडे ग्लासमधे घालून त्यावर पुदिन्याची चुरडलेली ताजी पाने, लिंबाची चकती आणि पन्हे ओतून छान सर्व्ह करू शकता. अहाहा! थंडगार पन्हे! आल्हाददायक!! 🙂❤️

- Food Memories Marinated with Love ♥️🌿🙏 by, स्नेहा चौधरी- इंदूलकर

#panhe #summer_drink #mango #raw_mango #cooler #aampanha #‍smoked_panhe