#रामनवमी_सुंठवडा_शिरा ❤️🌿🌼🌺🙏
आज रामनवमी!
रामनवमीच्या दिवशी, "राम जन्मला ग बाई राम जन्मला!" असे सूरेल स्वर भारदस्त आवाजात, आमच्या एडवण गावातील प्रसिद्ध श्री राममंदिरातील माईकवरून दुपारी १२ च्या सुमारास गावामधे गुंजत असत. गावातील तसेच आगर, मथाणे येथील देखील मंडळी, सुरेख तयार होऊन महिलावर्ग असे सारेच देवळात भक्तीभावाने रामजन्माचा सोहळा बघण्यास जमलेले असत. झगमगत्या प्रकाशयोजना, तोरणे आणि फुलांच्या माळा, सुरेख सडारांगोळ्या ह्यांनी मंदिर लखाखलेले दिसे. देवळातल्या श्रीराम, सीतामाई, लक्ष्मण, मारूतीच्या मुर्ती देखील सुरेख प्रसन्न सात्विक भावाने उजळलेल्या.... साखरे कुटूंबातील सदस्याकडून पुजन-अर्चनाचा मान असतो. सुंदरसा मंडप, तबला- पेटी, टाळ साथीने माईकवरून किर्तन प्रवचन करणा-या किर्तनकार एडवण दुमदुमून टाकतात.
फुलामाळांनी सजवलेल्या पाळण्यात मुर्तीरूपी श्री. रामांना झोका देण्यात येई. किर्तनकार आणि गावातील महिला छान एकत्र पाळणागीत गात असत. एकूणच उत्सवप्रिय एडवण गावात, मध्यवर्ती नाक्यावर असलेल्या ह्या राममंदिरात रामजन्म सोहळा रंगत असे. गावभर वाजतगाजत रामाची पालखीदेखील फिरवली जाते. यात्रादेखील भरते. सार्वजनिक नाटके किंवा पडदे लावून चित्रपटाचे आयोजन असते. 🙂🙏 गावत राहण्याची मज्जाच आगळी हे खरेच!
रामजन्मानंतर सा-या भक्तांना प्रसाद म्हणून भाविकांनी अर्पण केलेले गोडधोड पदार्थ आणि सुंठवडा प्रसाद म्हणून वाटत असत! ❤️
रामनवमीच्या निमित्ताने घरची, एडवणची पुन्हा आठवण आली.... काय धम्माल असायची गावात... उत्सवप्रिय एडवणमधे नेहमीच सर्व देवळांमधले समारंभ जल्लोषात करतात. आमच्याकडचे बाजार भरून ओसांडतात. आनंदीआनंद असतो. 😃🏵️🌼🌿 मम्मी देखील घरातले आवरून लगबगीने राममंदिर पोहोचत असे. रामनवमीच्या निमित्ताने पहाटेपासूनच साईबाबांच्या मंदिरात देखील, "श्री राम जय राम, जय जय राम, अमर तुझे हे नाम" चा गजर सुरू असे. आमच्याही घरी वाटण्यासाठी मोठ्या प्रमाणावर सुंठवडा केला जायचा त्या सुंठवड्याचा नाकाला हलकेच झोंबणारा वास पण हवाहवासा सुगंध संपुर्ण परिसरात दरवळायचा. एकूणच हा सुंठवडा पदार्थ आणि सुगंध माझ्या आठवणीत राम-नामाच्या वातावरणासोबत जोडला गेला.
सुंठवडा आवर्जून खा. कफविकारावर उत्तम आणि अजूनही अनेक औषधी गुणधर्म असलेला. प्रसादाच्या रूपाने अगदी थोडाथोडा खायचा. 🙂❤️
१. प्रसादाचा सुंठवडा:
सुंठवडा काही जण फक्त सुंठ आणि साखर एकत्र वाटून करतात. काही जण सुंठ, साखर आणि वेलची आणि वेगवेगळ्या पध्दतीने... आमच्याकडे अर्धी वाटी खोब-या किसच्या पावडरमधे, पाव वाटी सुंठ पावडर, पाव वाटीपेक्षा थोडी अधिक साखर (मिक्सरला बारीक करून) आणि धणा पावडर टाकतात. अगदी बारीक पावडर नसतात सुंठ आणि धण्याच्या. किंचित जाडसर. मस्त सगळे हे मिश्रण एकत्र करायचे आणि सुंठवडा तयार. राममंदिरात रामनवमी आणि हनुमान जयंती च्या दिवशी हा प्रसाद असतो.
२. श्री रामनवमीच्या निमित्ताने प्रसादाचा रवा-केळ्याचा शिरा:
आमच्याकडे रामनवमीच्या दिवशी गोडधोड पदार्थ म्हणून प्रसादाचा रवा-केळ्याचा शिरा बनवायची प्रथा आहे.
आई रश्मी इंदूलकर हा उत्तम बनवते. :)
साहित्य पाहून घेऊया:
१. पाव किलो तूप (आम्ही चितळेंचे वापरतो.)
२. पाव किलो बारीक रवा (साफ केलेला)
३. पाव किलो साखर
४. अर्धा लिटर दुध
५. एक-दोन पिवळी पिकलेली केळी
६. पाच-सहा बदामाचे उभे चिरलेले काप
७. पाच-सहा काजूचे तुकडे
८. बेदाणे/ मनूका
९. वेलची पावडर
१०. थोडीशी जायफळ पावडर
११. केशर काड्या दुधात भिजवून
१२. तुळशीची पाने
१. एक मोठा जाड बुडाची कढई गॅसवर चढवा. गरम झाली कि थोडेसे तुप ठेऊन बाकी कढईमधे ओता. गरम होत आले कि निवडून साफ केलेला रवा त्यात घाला व सतत परतत रहा. उत्तम शिरा जमून येण्यासाठी तो उत्तम सोनेरीसर भाजला जाऊन उमलुन येणे महत्वाचे आहे. बराच वेळ परतत भाजला कि खमंग असा वास येतो. उमललेला दिसतो. आणि तुप जरा रव्यावरती तरंगल्यासारखे वर छोटे बुडबुडे येत तरंगते म्हणजे समजावे रवा भाजला गेलेय. ही कढई गॅसवरून काढणे.
२. दुस-या छोट्या भांड्यात उरलेले तुप ओता. गरम झाले कि बदामाचे काप, काजूचे तुकडे परतून घ्या. केळींचे गोलसर कापदेखील ह्यात टाका. मस्त तुपात सुकामेवा आणि केळी ७-८ मिनीटे परतली कि किंचित जायफळ पावडर घाला. बेदाणे घाला. परत परता.
३. ह्या सुकामेवा-केळी मिश्रणात भाजलेला गरम रवा घाला. अगदी छान एकजीव करा. मग गरम दुध ओता. रव्याचे मिश्रण गरम असल्याने सारख्या तापमानाचे गरम दुध आपण घालतो. ह्यामुळे शिरा मस्त उमलतो. दुध आणि रवा अगदी एकजीव मिसळा आणि मंद गॅसवर झाकण ठेवून दहा-पंधरा मिनिटे उमलू द्या.
४. झाकण काढून परत एकदा सर्व उमललेले मिश्रण वरखाली करा आणि साखर घाला. परत व्यवस्थित परता आणि साखर विरघळेपर्यंत दहा-पंधरा मिनिटे झाकण ठेवून शिजू द्या.
६. झाकण काढून वेलचीपूड घालून ढवळा आणि तुळशीपाने घालून वरखाली करा.
अगदी उत्तम मऊसुत चविष्ट शिरा तयार!!! 🙂🙏
नैवेद्यासाठी आमच्याकडे दोन सण सोडता बाकी दिनी कांदा लसूण विरहित नैवेद्य अर्पण केला जातो. परंतु संक्रांत आणि रामनवमीच्या दिनी आम्ही जो नैवेद्य दाखवतो त्यात कांदा असतो. रामनवमी दिवशी शिरा, वरण-भात-दही-तुपसोबत, सुका झुणका, भाकरी, चटणी आणि एखादी भाजी असा ठरलेला नैवेद्य बेत असतो. ❤️🌿
पोस्टमधील फोटो हे आमच्या एडवणच्या राममंदिर येथील दोन वर्षांपूर्वी च्या उत्सवातील आहेत. राम आणि इतर मुर्तींचे फोटो Shree Ram Mandir Edwan ह्या फेसबुक पानावरून Admin च्या परवानगीने घेतले आहेत. ❤️🏵️🌼🌿
जयश्री राम!!! 🙏🌼🌺
#ramnavami #edwan #shreeram #rammandir #sheera #sunthvada #sunth #dryginger #prasad #festivals #सुंठवडा
- Food Memories Marinated with Love ♥️🌿🙏 by, स्नेहा चौधरी- इंदूलकर
