उपवासाला होतील असे कच्च्या केळ्याचे काप 🍌🍌😍

 उपवासाला होतील असे कच्च्या केळ्याचे काप 🍌🍌😍

एडवणला घराच्या पाठीच हिरवीगार प्रफुल्लित करणारी केळीची बागायत... वर्षभर या ना त्या झाडाला सतत केळीचे घड लगडलेले... आमच्या पालघर पट्ट्यातही नाजूक दर्जेदार वेलची केळी, भुरकेळी, लांबट वेलची, राजेळी, मांसल केळी आणि अजूनही निरनिराळ्या त-हेच्या केळीच्या जाती मोठ्या प्रमाणात होतात... केळ हे झाड पण असे कि लावल्यानंतर लग्गेच वर्षाच्या आत भरलेले लोंगर तयार! केळ्यांची हौस म्हणून मम्मीनेदेखील ५-६ केळीचे नुकतेच उगवलेले कोंब विरारला लावायला दिले. आणि वर्षभरात केळीची हिरवीगार आल्हाददायक बागच तयार झाली. केळीचे पान सतत वापरायला तर आवडतेच मला आणि घडाला लगडलेली ताजी कच्ची केळी काढून स्वयंपाकात वापरही करायला मज्जा वाटते. कच्च्या केळीचे काप आणि नारळाचा चव वापरून आम्ही उपवासाची भाजी देखील करतो. तर मुग-केळी, 'बोंबलाचा पोपट' भाजी देखील केळीच्या कच्च्या कापांनी तयार होते. उकडहंडी हा संक्रांतीवेळचा खास पदार्थ बनवताना ही आम्ही कच्ची केळी वापरतो.

उपवासाला साबुदाणा वडे, खिचडी, कच्च्या केळ्याची भाजी, फिंगर चिप्स, भगर वैगरे सोबत कच्च्या केळ्याचे कापदेखील घरी केले जातात.  उपवास नसतानाही, घरी कधी चमचमीत मसालेभात किंवा तांदुळाची भाकरी केली की सोबत मस्त कुरकुरीत कच्च्या केळ्याचे, वांग्याचे किंवा सुरणाचे काप तोंडी लावायला छान लागतात आणि करायलाही अतिशय सोपे असतात....

पाच सहा मोठ्या आकाराची कडक, हिरवीगार केळी स्वच्छ धूवून  घ्या. मग सोलाण्याने साले सोलून मधला गर तेवढा घ्या. त्याच्या थोड्या जाडसर अशा लांबट कापा कापून घ्या. कापलेल्या कापांना लगेचच थोडासा तेलाचा हात लावा अन्यथा कापा काळसर पडतील. थोडेसे मीठ चोळा.

कढईत किंवा पॅनमधे तेल गरम करून त्यात कापा अगदी कडक होईतोवर तळा. तुम्ही shallow किंवा deep fry दोन्ही प्रकारे करू शकता. टिश्युपेपरवर काप काढून तेल निथळले कि केळीच्या पानावर वाढा. वरून थोडीशी काश्मिरी मिरची पावडर आणि ताजी बनवलेली काळे मिरे पावडर भुरभुरावा आणि मस्त आस्वाद घ्या.

उपवास नसेल तेव्हा अंदाजानुसार बेडगी मिरची पावडर, सेलम हळद पावडर, काळेमिरे पावडर, आलेलसूण पेस्ट, लिंबाचा रस, चिमुटभर साखर व चवीपुरता मीठ एकत्र करून कच्च्या केळीच्या कापलेल्या कापांना सर्व बाजूंनी व्यवस्थित लावा. तव्यावर तेल गरम करून केळ्याचे काप गोलाकार लावून मस्त वरून खालून तळून घ्या. बारीक चिरलेली कोवळी कोथिंबीर पण वरून थोडी टाका.

अशाच पध्द्तीने सुरण, वांग्याचे काप देखिल करू शकता. :)  सर्व्ह करताना बारीक चिरलेली कोवळी कोथिंबीर वरून भुरभुरवा. 

- Food Memories Marinated with Love ♥️🌿🙏 by, स्नेहा चौधरी- इंदूलकर

#कच्च्या_केळ्याचे_काप #raw_banana_chips

#fasting_menu #banana

सुरण-बटाटा पॅटिस/ कटलेट ❤️

 सुरण-बटाटा पॅटिस/ कटलेट ❤️

काही दिवसांपूर्वी अमेय ह्या चुलतभाऊ कडे आमच्या माहिम च्या शैला आत्याने वाडीतला ताजा टवटवीत भाजीपाला पाठवला. आमचा डहाणू ते नायगाव पट्टा वाड्यांनी-मळ्यांनी फुललेला... सगळ्यांच्याच घरोघरी परसबाग, वाड्या असल्या तरी अशी घरची भाजी पाठवून प्रेम-माया सहज व्यक्त केली जाते. 

आत्याकडच्या केळवा माहिमच्या समृद्ध वाडीतली काळसर देठाची मोठाली अळूची पाने, नुकतीच काढलेली केळफुले, माती साफ करून दिलेला सुरणाचा गड्डा, पिवळीधम्मक वेलची केळी, भलेमोठ्ठे नारळ आणि माझा आवडता चाफा असा सर्वच ऐवज अमेयने दिला. प्रेमाने धाडलेला हा ताजा नजराणा पाहून कितीतरी पटीने अधिक आनंद झाला. Thank you Amey! 😁🙏

सुरण छान स्वच्छ करून‌ दिलेला आणि आम्ही लावलेला बागेतला सुरण देखील होता. त्यामुळे सुरणाच्या अनेक पाककृती लागोपाठ झाल्या. घरी कित्येक वर्षांपासून लावलेला सुरणाचा कंद, दरवर्षी अगदी त्याच्या वेळेत फुलून येतो. मातीतून उगवलेल्या उग्र दर्प असलेल्या जांबळट-व्हेलवेटी ब्राऊनिश फुलाच्या रूपापासून ते हिरव्यागार बहरलेल्या उंच देखण्या झुडपासारखी सगळीच रूपे निराळी सुरणाची... सुरणाचे काप, सुरणाची तुपातली भाजी, बाळंतीणीला खास बनवलेली कोकम घालून बनवलेली पथ्याची भाजी, बावर्ची सिनेमात दाखवलेली मटणासारखी लागणारी  भाजी अशा सर्वच पध्दतीने आमच्याकडे सुरण आवडीने खाल्ला‌ जातो. त्यातच समीरा रेड्डी ह्या अभिनेत्री ने तिच्या गुजराती सासूसोबत बनवलेले सुरण-बटाट्याचे पॅटिस फेसबुकवर नजरेस पडले. लग्गेच बनवले, आवडले म्हणून पोस्ट केले. By the way, समीरा रेड्डी आणि तिची सासू मंजिरी वर्दे ह्यांचे basic ingredients वापरून बनवलेले फुड व्हिडीओ खुप छान असतात. 😁

सुरण-बटाटा पॅटिस/ कटलेट: 

१. दोन वाटी सोलून साफ करून तुकडे सुरण आणि दिड वाटी सोललेला बटाटा कुकरला दोन-तीन शिटीमधे शिजवून घेतले.

२. तीन-चार सफेद किंवा ब्राऊन ब्रेड स्लाईस थोडेसे पाण्यात भिजवून घेतले.

३. बारीक चिरलेला अर्धी वाटी कांदा, कोथिंबीर, दीड लहान चमचा आले लसूण मिरची पेस्ट (मिरची कमी तिखट असलेली वापरली), 

४. गरजेनुसार धणा पावडर, जीरा पावडर, चाट मसाला, गरम मसाला आणि मीठ घेतले. (मी थोडासा चीझ वापरला.) 

५. वरील सगळे छान मिसळून मळून घेतले पण अगदी एकजीव नाही केले. परत थोडी कोथिंबीर आणि लिंबाचा रस घातला आणि परत एकदा वरखाली करत मिश्रण बांधून घेतले. वाफवलेले मटार दाणे घातले. हे जास्त मिसळायचे नाही. अख्खे छान वाटतात.

६. गोळे चपटे थापून तेलावर शॅलो फ्राय करून घेतले. उकडलेले हिरवेगार मटार मधेमधे छान दिसतात आणि लागतात.

खरेच इतका सुंदर सोनेरी-ब्राऊन रंग आणि क्रिस्पी रूप येते ह्या पॅटिसला... मस्त वाटते पाहून... आणि चवीलाही आवडले घरी सर्वांना. पटकन‌ संपले.

- Food Memories Marinated with Love ♥️🌿🙏 by, स्नेहा चौधरी- इंदूलकर

अशाच वेगवेगळ्या पदार्थांच्या पाककृती आणि निरनिराळ्या मसाल्यांच्या माहितीसाठी खालील लिंकला 'Like' करा.

https://www.facebook.com/themasalabazaarstore/

आणि आमच्या Official Website ला नक्की भेट द्या.

www.themasalabazaar.com

#सुरण #सुरणाच्यावड्या #सुरणाचे_कटलेट #elephantfootyam  #suran #edwan

चंपारण लसुणी हंडी चिकन

लाॅडाऊनच्या सुरवातीला कधीतरी Facebook‌ वर येणारे Foodbloggers चे व्हिडिओ पाहताना अभीला चंपारण लसुणी हंडी चिकन ची एकदम गावरान रेसिपी पहायला मिळाली. बिहार येथील लोकप्रिय अशी डीश आहे ही. Abhiee is a decent cook! जे पण बनवतो ते हौसेने... त्याला साध्या सोप्या पाककृती आणि पदार्थ आवडतात आणि बनवतानाही तो अगदी मोजके बनवतो म्हणजे 'पुरून उरेल' नाही पण 'वाढून संपेल' असे. मग चंपारण चिकन साठीची up to date साहित्य यादी त्याने काढली, मी ह्यावेळी सहाय्यक च्या भुमिकेत होती. काळ्या रंगाची उभट सुगड आणि एक पसरट विटकरी लंगडी आईने सकाळीच चकचकीत धुवून ठेवली. सरसों का तेल घरी आणून ठेवले गेले. गावठी अख्खे लसूण देखील होतेच. ते नंतर वापरले. खडा मसाला घेऊन, परतून, पावडर करून वापरला. ती खासियत आहे ह्याची..

ह्या पाककृती पध्द्तीमधे चिकनला 'दम' देऊन शिजवतात. दम दिल्यामुळे मसाल्यात परतलेले चिकन, मातीच्या भांड्यात अजूनच चविष्ट लागते. अख्खे लसूणाचे कांदे देखील टाकतात. उकडलेला‌ किंवा शिजलेला मसालेदार लसूण खुप जबरदस्त लागतो. हा पदार्थ चपातीसोबत अधिक चांगला लागतो पण आम्ही त्यादिवशी ब्रेडबरोबर आस्वाद घेतला.

सरसों म्हणजेच राईचे तेल लंगडीमधे गरम करून पाणी टाकून फाडले अभीने अगदी काळजीपूर्वक अर्थातच... आणि तेव्हा कुठे तो तेलाचा उग्र वास गेला आणि जीवात जीव आला. या चिकनची पाककृती युट्युबवर अगदी विस्तारित स्वरूपात मिळेल. आखाडीला जमल्यास वेगळे म्हणून नक्की करून पहा. गावठी चिकन आणि चुलीचा वापर करता आला तर चवीमधे अजूनच अव्वल होईल. हंडीला लावलेले पीठ काढले की विशिष्ट दरवळ जिव्हेला आव्हान देतो. एकंदरीत मंद आचेवर शिजलेले हे मसालेदार चंपारण चिकन हांडी खुप चविष्ट लागते. नक्की बनवा. 

.

.

‌.

.

.

.

#चंपारण_चिकनहांडी #हंडीचिकन #बिहार #champaran_chicken_handi #handi_chicken #laxmimasale #themasalabazaar

Papad & Fryam

      Papad & Fryam Variety

At Laxmi Masale, Edwan and The Masala Bazaar, Virar we do keep variety of homemade and branded papads and Fryams. We also catered to bulk orders.

Variety of Papads and Fryams:

1.       Udid Kalemire Papad

2.       Tandul (Rice) Papad

3.       Nachani Papad

4.       Tandul (Rice) Kurdai

5.       Gahu (Wheat) Kurdai

6.       Fenya

7.       Batata (Potato) Wafers

8.       Poha Mirgund

9.       Poha Papad

10.   Sabudana Papad

11.   Fryam

12.   Roasted Shevaiya

13.   Raw Shevaiya

14.   Kolhapur Special Rawa-Maida Shevaiya

15.   Dahyatalya Mirachya

16.   Sandagi Mirachya

17.   Sandage

18.   Nachani Salai

19.   Chikvadya

You can message us on 9890043675 to know more about any product available at the store and order various products with home delivery option. 

To know how to use various instant gravies and premixes, kindly visit our Facebook page:
https://www.facebook.com/themasalabazaarstore/

#themasalabazaar #laxmimasaleedwan #saheliutpadaneedwan

Garam Masala/ गरम_मसाला

#Garam_masala #गरम_मसाला
#लक्ष्मीमसालेचास्पेशलगरममसाला

भारतीय मसाले हे त्यांच्या वैविधपुर्ण अनेक घटक, विशिष्ट चव, उग्र वास, आरोग्यदायी उपयोग आणि आकर्षक आकार व रंग ह्यासाठी जगप्रसिद्ध आहेत. ह्या बहुतांशी सर्वच खास भारतीय अथवा एशियन मसाल्यांच्या मिश्रणाने तयार होणारा Multipurpose all in one Brownish गरम मसाला म्हणजे आपणा भारतीयांच्या नेहमीच्या जेवणामधे हमखास लागणारा महत्त्वाचा घटक!
एडवणला आमच्या लक्ष्मी मसाले स्टोअरमधे दरवर्षी जानेवारी ते जून हा वर्षभराचे मसाले बनवणारे आणि भरणारे अशा ग्राहकांचा सिझन असतो. आमल्याकडे सर्व प्रकारचे दर्जेदार अख्खे मसाले, सहा प्रकारच्या मिरच्या, तयार पावडरी, चविष्ट घरगुती मसाले, चिंच, कोकम, निरनिराळी लोणची, अनेक प्रकारचे पापड व पीठे कमी किंमतीत मिळतात. त्यामुळे वर्षानुवर्षेपासून पंचक्रोशीतील ग्राहकांबरोबरच विरार, मुंबई, ठाणे, डहाणू अशा अनेक ठिकाणांवरून हौशी ग्राहक, सुगरण महिला आवर्जून अख्ख्या व तयार मसाल्यांसाठी उन्हा-तान्हाची व गर्दीची तमा न बाळगता हजेरी लावतात. खुप आवडीने वर्षभराचे सामान गाड्यांमधे घे-घे करतात.

जेव्हा ह्या महिला मसाले घ्यायला येतात तेव्हा 25 वाणे मसाल्यांच्या सामानाची नावे व प्रमाणे आपण ज्याच्या-त्याच्या कलेने, आवडीने आणि हो काही वेळा त्यांच्या बजेटनुसार आपण बनवून देतो. वाङवळी, कुणबी, ब्राम्हण, सोनार, सुतार, कोळी, आगरी आणि अशा विविध लोकांच्या जेवणाच्या पध्दतीचा अंदाज घेवून आपण मसाल्यांची प्रमाणे देतो. काही तयार मसाले नेतात. त्यामधे रोजच्या मसाल्यांसोबत गरम मसाल्याचे प्रमाण महिला नेहमी मागतात.  म्हणून आज एक ढोबळमानाने वापरले जाणारे गरम मसाल्याचे प्रमाण देत आहोत.

हा गरम मसाला बनवताना त्यामधे मिरची पावडर व हळद पावडर घालत नाहीत. कोणतीही शाकाहारी वा मांसाहारी भाजी बनवताना ह्याचा उपयोग होतो. अगदी मसाले भात किंवा बिर्याणी पुलाव, पॅटीस, शाही पंजाबी भाज्यांसाठी देखिल वापरता येतो. नुसत्या या मसाल्यावरही पदार्थ छान लागतात आणि इतर बहुतांशी मसाल्यासोबतही हा पदार्थामधे वापरला जातो. तसेच एकदा मसाला बनवून डब्यात ठेवला कि सहा सात महिने मस्त राहतो.

तर बघुया काय अख्ख्या मसाल्याचे घटक लागतात गरम मसाला बनवण्याकरीता:
धणे: (coriander seeds): 200 Gram ( काही जण धणे घालत नाहीत)
जीरे: (cumin seeds): 160 Gram
काळेमिरे: (black pepper): 120 Gram
लवंग: (cloves): 60 Gram
दालचिनी: (cinnamon): 100 Gram
जायवंत्री: (Mace): 40 Gram
रामपत्री: (Rampatri): 40 Gram
मसाला वेलची: (Black cardamom): 60 Gram
शहाजीरे: (Caraway seeds): 60 Gram
वेलदोडा/ हिरवी वेलची: (Green Cardamom): 60 Gram
हिंग: (Asafoetida): one teaspoon
बादियान/चक्रिफुल: (Star anise): 50 Gram
तमालपत्र: (Bay Leaf): 30 Gram

वरील सर्व मसाल्याचे पदार्थ चांगल्या दर्जाचे, ताजे व कोरडे असावेत. ते नीट स्वच्छ निवडून घ्या. मग एक एक करीत हिंग सोडून सारे जिन्नस गरम तव्यावर एखाद मिनिटासाठी न करपवता व न जाळता हलकेसे शेकून घ्या.
(तुम्ही हाताला कुकिंग तेल लावून हलकेच मसाल्यांवरदेखिल फिरवून मग मसाले तव्यावर टाकू शकता. ह्याने मसाला अजून छान लागतो आणि गडद दिसतो आणि चांगला टिकतो.)

शेकलेले मसाले पुर्ण थंड होऊ द्या. मग मिक्सरमध्ये नीट बारीक पावडर करून घ्या. तुम्हाला जाडसर भरड हवा असल्यास मिक्सरला कमी फिरवा.
झाला तुमचा गरम मसाला तयार! मिक्सरमधून काढल्याबरोबर डब्यात भरू नका. गरम असल्याने बाष्प धरून मसाला खराब होऊ शकतो. थंड झाला की चांगल्या बरणीत भरून वापरा.

वरील कोणत्याही अख्ख्या मसाल्याच्या जिन्नसाचे प्रमाण तुम्ही तुमच्या आवडीनुसार थोडेफार कमी अधिक करू शकता.
● सौम्यपणा अधिक हवा असल्यास धणा व जीरे चे प्रमाण वाढवा व काळेमिरे, लवंगाचे प्रमाण कमी करा.
● तिखट व उग्र गरम मसाला हवा असल्यास धणा, जीरे चे प्रमाण कमी व काळेमिरे व लवंगाचे प्रमाण वाढवा. शक्यतो काळेमिरेचे प्रमाण वाढवावे कारण लवंगाचा जहाल तिखटपणा त्रासदायक वाटू शकतो.
● थोडा जायका वाढवायचा असल्यास मसाला वेलची, हिरवी वेलची, शहाजीरे, जायवंत्री जास्तीची घालावी.
● काहीजण आजकाल, जायक्यासाठी थोडी कसूरी मेथी व all spice ची सुकी पानेदेखिल घालतात. मी कधी तसे वापरून न पाहिल्याने वरती लिहीलेले नाही.
● काहींच्या गरम मसाला प्रमाणांत कबाबचिनी, नाकेशर, खसखस, दगडफुल, एखादे जायफळचादेखिल समावेश असतो.
● ह्याच गरम मसाल्यातला निम्मा मसाला काढून त्यात पाव किलो काश्मिरी मिरची पावडर, पाव किलो बेडगी मिरची पावडर व पाव किलो पटणा मिरची पावडर घातली की मस्त रोजच्या जेवणात वापरायचा मसाला तयार होतो.

तर मग छानपैकी घरी गरम मसाला बनवून चविष्ट जेवण बनवा. आणि नाहीच वेळ मिळाला तर आमचा तयार लक्ष्मी मसालेचा स्पेशल गरम मसाला Online घरपोच मागवा.

#garam_masala #fresh_spice_blends
#laxmi_masale #laxmi_masale_edwan #the_masala_bazaar #masala_bazaar_virar

Prawns Biryani / कोलंबी_भात

#कोलंबी_भात

लक्ष्मी मसालेचा बिर्याणी पुलाव मसाला वापरून केलेला चमचमीत कोलंबी भात!

कोलंबी भात म्हणजे One_pot_recipe म्हणून आधीपासूनच माझा आवडता पदार्थ... एडवणला मस्त भाकरी आणि कोळंबी ची आमखंडी, तळलेले पापलेट, बोयमासेचे कालवण आणि कोलंबी भात म्हणजे अफलातून भन्नाट Seafood combination असायचे.

भाताचे अनेक-विविध प्रकार असतात. काही गोडसर, तिखट, थर लावून केलेले आणि निरनिराळ्या भाज्या टाकून केलेले आणि अनेक त-हेत-हेच्या पध्दतीने बनवलेले...
शाकाहारी किंवा मांसाहारी अशी कोणतीही बिर्याणी, भाताचा प्रकार अथवा पुलाव बनवण्यासाठी लक्ष्मी मसालेचा बिर्याणी पुलाव मसाला वापरता येतो.

पुर्वी फक्त समारंभात हमखास केला जाणारा बिर्याणी- पुलाव हा भाताचा प्रकार आजकल घरोघरी वरचेवर केला जातो. खाली दिलेल्या साहित्याची यादी जरी मोठी वाटली 20 एकदा पध्द्त समजून बनवली की परत बिर्याणी किंवा कोलंबी भात बनवणे तितकेही अवघड नाही.

साहित्य पाहून घ्या.

साहित्य:
दोन वाट्या बासमती तांदूळ किंवा तुमच्या आवडीचा तांदूळ  (एक तास भिजवलेला)
15-20 मध्यम आकाराच्या कोलंबी
एक लहान गाजराचे सोलुन कापलेले लांब व बारीक तुकडे (आवडत असल्यास)
दही अर्धी वाटी
आले लसूण वाटण
लिंबू रस एक लिंबूचा

हिरवी मिरची 4 मधे उभी चिर पाडून
लसूण पाकळ्या 7-8, बारीक उभ्या चिरून
आले एक इंच- अगदी बारीक तुकडे करून
दोन वाट्या कोथिंबीर बारीक चिरून
एक वाटी पुदिना चिरून
दोन कांदे उभे चिरून
तीन टाॅमेटो चिरून

मसाल्याचे पदार्थ:
दोन मसाला वेलची
सहा हिरवी वेलची
तीन-चार दालचिनी तुकडे
चार तमालपत्र
आठ दहा काळेमिरे
चार लवंगा
थोडेसे शहाजीरे
एक जायवंत्री
थोडी कसूरी मेथी
मीठ
चिमुटभर साखर
तेल व तुप
लक्ष्मी मसालेचा बिर्याणी पुलाव मसाला दोन ते तीन चमचे
थोडेसे काजू
थोडेसे बेदाणे
बिरिस्ता (तळलेला कांदा)

पाच सहा केशरकाड्या घातलेले कोमट दुध
गव्हाचे मळलेले पीठ

चला सुरूवात करूया चविष्ट कोलंबी भाताला! वरील जिन्नसाची  यादी खुप मोठी लांबलचक वाटली तरी पध्दत सोपी व सुटसुटीत आहे.

१. एका भांड्यात मोजके तेल गरम करा. त्यात चिरलेला लसूण- आले, कांदा व टाॅमेटो आणि कोथिंबीर तळा. मग हे थंड झाल्यावर मग मिक्सरमध्ये बारीक प्युरी करा व बाजूला ठेवा.

२. परत त्याच भांड्यात तेल गरम करा. मग सगळे अख्खे खडे मसाले तेलात तडक्याला टाका. नीट परता. मग चिरलेला कांदा टाकून सोनेरी रंगावर तळून घ्या. आलेलसूण पेस्ट टाका. थोडे काजू व बेदाणे पण टाका.

३. आता आधीच बनवलेली कांदा टाॅमेटो प्युरी टाकून ढवळा. मग हिरवी मिरची, आले, लसूण, थोडी कोथिंबीर व थोडा पुदिना, कसूरी मेथी, मीठ, साखर, लक्ष्मी मसालेचा बिर्याणी पुलाव मसाला दोन ते तीन चमचे, दही सारे टाकून व्यवस्थित परता. पाच मिनिटं शिजू द्या. लिंबू रस पिळा.

४. मग सर्व सोललेल्या कोलंबी व एक तास भिजवलेला बासमती तांदूळ टाकून व्यवस्थित परता. आणि थोडेसे तूप घालून नीट ढवळा.

५. एक कप कोमट दुधामध्ये भिजत ठेवलेले केशर शिंपडा व हलकेच ढवळून घ्या. आणि अंदाजे थोडे पाणी ओतून कुकरला तीन शिट्या करून घ्या.

६. वाफ गेली कि झाकण खोलुन, हलकेच भात वरखाली करा. तळलेला कांदा, चिरलेली कोथिंबीर, चिरलेला पुदिना याचा भातावर थर दया, तळलेले काजू वरून टाका.

जर  कोलंबी भाताला दम द्यायचा असेल तर, गव्हाचे पीठ लावून झाकण चिकटवून ठेवून तव्यावर भांडे ठेवावे व तव्याला १० मिनिटे मंद आचेवर ठेवून दम मिळू द्यावा.

झाकण काढले की छान सुगंध येतो. तर मग  तयार गरमागरम कोलंबी भात सफेद कांदा -दह्याच्या रायत्या बरोबर सर्व्ह करा.

हा भात अनेक वेगवेगळ्या भाज्या वापरून करता येते.
नुस्ते मशरुम्स् किंवा भोपळी मिरची-गाजर-मटार-फ्लॉवर combination वापरून देखिल बनवता येते.

लहान-थोर सगळ्यांना नक्की आवडेल.

#कोलंबीभात #prawns_biryani #laxmi_masale_edwan #laxmi_masale #spiceblends_virar #masala_bazaar #biryani_pulav_masala #biryani_masala #pulav_masala #spice_blends_edwan

Bombil Thecha/ सुक्या_बोंबलाचा_ठेचा

#सुक्या_बोंबलाचा_ठेचा

समुद्र किनारी वसलेल्या एडवण गावी ताज्या मासोळ्यांबरोबरच उत्कृष्ट दर्जाची सुकी मच्छी मावरे मिळते. समुद्रकिनारी मस्त बोंबिल आणि अन्य मासे खाऱ्या वाऱ्यावर उन्हात सुकण्यासाठी ओलाणीवर रांगेत टांगलेले दिसतात. सोडे बनवण्यासाठी कोलंबी आणि करंदी, जवळा ठिकठिकाणी जमिनीवर पसरतात. सुकी मच्छी अडिअडचणीत किंवा  घाईघाईने ताजे मासे आणता नाही आले तर वापरता येते. सुक्या मच्छीचे पदार्थ छानच लागतात पण अर्थात सर्वांनाच सुकी मच्छी आवडतेच असे नाही.
आज आपण पाहणार आहोत हा साधासोपा सुक्या बोंबलाचा ठेचा बनवतात कसा...
आपल्याला लागणार आहेत दहा सुके बोंबिल, पाच तिखट हिरव्या मिरच्या, दहा बारा लसूण पाकळ्या, मीठ, आवडत असल्यास लिंबाचा रस.

बोंबील गॅसवर किंवा चुलीमधे अगदी खरपुस आणि सर्व बाजूंनी व्यवस्थित भाजून घ्या. थंड झाल्यावर मधोमध चिरुन काटा काढून टाका. हातानेच तोडत बोंबलाचे लहान लहान तुकडे करा. आता मोठ्या खलबत्त्यात किंवा पाटा वरवंटयामधे बोंबलाचे तुकडे, मिरच्यांचे तुकडे, लसुण पाकळ्या, लिंबू रस, मीठ सारे टाकून बारीक सर ठेचून घ्या. वरवंटा वैगरे नसल्यास हलकेच मिक्सरमध्ये फिरवा.
अफलातून चवीचा हा सुक्या बोंबलाचा ठेचा तांदळाची भाकरी, वाफाळता भात आणि शेंग कोलंबी कैरी भाजी बरोबर अप्रतिम लागते.
नक्की हा ठेचा बनवून पहा.

#बोंबलाचा_ठेचा #bombay_duck_chuteney
#bombil_thecha #dry_fish_recipes #edwan #laxmi_masale_edwan #the_masala_bazaar